Mèssicu – Sos “Awake for Days” ant abbertu su Festival Hell&Heaven (Vìdeo)
Resessida manna in Tzitade de su Mèssicu pro sa band de Nùgoro “Awake for Days”, chi est pràghida a machine in su Festival Hell&Heaven de su Foro Pègaso, in ue ant sonadu maigantos grupos internatzionales che a sos Muse, Slipknot e Guns n’ Roses, partzidos subra de chimbe palcos
Sa band sarda s’est fata onore in sa segunda serada de su fèstival, sàbadu 4 de su mese de santandria, cun un’aclamatzione manna dae su pùblicu latinu, cosa de non crèere, postu in dillìriu dae sa fortza espressada in su palcu dae Lukas (boghe), Nic (bassu), Andrew (bateria) e Matt (chiterra), acumpangiados in cust’aventura dae tota s’iscuadra de sa Silent Ghost in sa figura de su produtore Eddy Cavazza, de sa manager Kelley Wright e de su giornalista Andrea C. Loi in sa parte de s’ufìtziu pro s’imprenta e videomaker.
Sos “Awake for Days” sighint gasi custu annu profetosu, a pustis de s’ùrtimu tour mannu fatu in sos USA in su beranu de su 2023, cun prus de chimbanta presentadas in terra americana, in ue ch’ant giai brincadu sos chentu cuntzertos.
S’essida de su segundu album “Multiverse”, chi at lòmpidu unu millione de “streamings” in Spotify, e sa publicatzione frisca frisca de su sìngulu nou “Betrayed” registradu in Los Angeles in paris cun su cantante americanu Cristian Machado, lis at permìtidu de partetzipare a su festival famadu de su Mèssicu.
A sa torrada in Sardigna su grùpu at a èssere protagonista de “School Tour”, una faina posta in campu cun s’agiudu de s’amministratzione comunale de Nùgoro, pro fàghere abbojare a paris sas band e sos istudentes de sas iscolas a inditu musicale, a manera de cumpartzire sas esperièntzias chi los ant giutos a s’àtera ala de su mundu gràtzias a sa mùsica issoro.
